Եթե միայն․․․

Եթե միայն ինձ տաքացներ 

վառարանի ծուռ բերանից
դուրս պրծնել փորձող կրակը,
ես կսիրեի...
Ու թե միայն
մատներս այրեր հին ու 
ամուր թեյնիկի բռնակը,
ես կսիրեի...
Եթե միայն 
տուն գալիս լինեի լոկ
ցրտի համբույրներից շիկնած,
ես կսիրեի...
Ու թե միայն տաքության 
անսպասելի գրկախառնությունից 
ես հալչեի ու ցավ զգայի,
(որովհետև սառն ու տաքը
խառնվել են իրար)
ես կսիրեի...
Եթե միայն փաթիլը ձյան
(որ այտիս վրա շունչն իր առավ 
ու ետ` երկինք դարձավ)
երջանկության նման
կարճ կյանք չունենար,
ես կսիրեի...
Ու թե միայն ցուրտն ինձ սիրեր,
ես կսիրեի...
Ես կսիրեի ձմեռը: